Mae’r DMO yn cyhoeddi Manyleb y Peiriant Gwerthu Gwrthdro (RVM) – carreg filltir allweddol i’r Cynllun Dychwelyd Ernes
Mae UK Deposit Management Organisation (DMO) heddiw wedi cyhoeddi Manyleb swyddogol y Peiriant Gwerthu Gwrthdro (RVM), gan nodi’r safonau a’r gofynion perfformiad ar gyfer y peiriannau awtomataidd a fydd yn casglu cynwysyddion diodydd o dan Gynllun Dychwelyd Ernes (DRS) y DU.
Mae’r fanyleb yn nodi sut y bydd RVMs yn gweithio yn y cynllun a beth sy’n ofynnol gan y rhai sy’n eu cyflenwi neu’n eu gweithredu. Mae’n garreg filltir bwysig sy’n rhoi’r sicrwydd i’r diwydiant symud ymlaen â’i gynllunio.
Troi polisi’n seilwaith
Bydd Peiriannau Gwerthu Gwrthdro yn chwarae rhan ganolog yn y Cynlluniau Dychwelyd Ernes sy’n cael eu cyflwyno ledled Lloegr, yr Alban a Gogledd Iwerddon. Byddant yn caniatáu i ddefnyddwyr ddychwelyd cynwysyddion diodydd gwag, fel poteli plastig a chaniau, ac adennill eu hernes.
Mae’r fanyleb newydd yn sicrhau bod pob peiriant yn bodloni safonau cyson o ran dibynadwyedd, hygyrchedd a pherfformiad ar draws y tair gwlad, gan ganiatáu ar yr un pryd ar gyfer arloesi a gwelliannau technolegol yn y dyfodol a all wella profiad y defnyddiwr, effeithlonrwydd neu berfformiad amgylcheddol dros amser.
Cefnogi parodrwydd y diwydiant
Mae’r DMO wedi gweithio’n agos gyda chyflenwyr RVM, rheoleiddwyr ledled Lloegr, yr Alban a Gogledd Iwerddon, ac aelodau o’i Grŵp Cynghori’r Diwydiant i baratoi a chwblhau’r manylebau. Mae’r cydweithio hwn wedi helpu i sicrhau bod y safonau’n ymarferol i gyflenwyr eu cyflawni ac yn bodloni anghenion cynhyrchwyr a manwerthwyr.
Yr hyn y mae’r fanyleb yn ei gwmpasu
Mae’r ddogfen yn amlinellu’r meini prawf gofynnol y mae’n rhaid i RVMs eu bodloni, gan gynnwys cywirdeb adnabod cynwysyddion, rheoli data a chysylltedd. Mae hefyd yn nodi disgwyliadau ar gyfer ardystio peiriannau, integreiddio â systemau’r DMO, a defnyddio brandio a negeseuon cymeradwy i ddefnyddwyr.
Mae’r fanyleb wedi’i chynllunio gyda defnyddwyr mewn golwg, gan sicrhau bod peiriannau’n ddibynadwy, yn hygyrch ac yn syml i’w defnyddio. Mae’n gosod disgwyliadau clir ar gyfer nodweddion fel negeseuon ar y sgrin, opsiynau hygyrchedd a phrosesau ad-dalu, gan helpu i wneud dychwelyd cynwysyddion yn gyflym ac yn syml ble bynnag y mae pobl yn byw.
Rhagor o fanylion i ddod
Mae’r manylebau a gyhoeddwyd heddiw yn cwmpasu’r gofynion caledwedd ar gyfer RVMs. Mae hyn yn rhoi’r hyder i gyflenwyr, manwerthwyr a gweithredwyr Pwyntiau Dychwelyd gynllunio a gosod archebion gan wybod y bydd eu peiriannau’n bodloni’r safonau sy’n ofynnol ar gyfer y cynllun.
Mae’r gofynion meddalwedd a rhaglennu ar gyfer RVMs yn dal i gael eu datblygu a byddant yn cael eu cyhoeddi yn unol â systemau TG ehangach y DMO y flwyddyn nesaf, gyda’r bwriad i’w rhyddhau yn haf 2026.
Bydd y DMO hefyd yn cyhoeddi rhagor o fanylion yn 2026 ynghylch yr iawndal sydd ar gael i weithredwyr Pwyntiau Dychwelyd am brynu neu brydlesu RVMs, fel rhan o’r Ffi Trin Dychweliadau (RHF). Bydd ymgynghoriad helaeth ar y RHF yn cael ei gynnal drwy’r Grŵp Cynghori’r Diwydiant gan ddechrau’r hydref hwn, gyda rhagor o fanylion am strwythurau ffioedd i’w disgwyl yn ail hanner y flwyddyn nesaf.
Mae manyleb lawn yr RVM ar gael i’w llwytho i lawr o adran Adnoddau’r wefan.