Exchange For Change yn cyhoeddi seilwaith ailgylchu newydd yn y DU i gyflawni’r Cynllun Dychwelyd Ernes
- Bydd gwasanaethau logisteg a phrosesu yn cael eu darparu gan rwydwaith o ddarparwyr ailgylchu sy’n cyflwyno ateb cadarn a graddadwy ledled y DU
- Bydd y buddsoddiad yn helpu i greu tua 700 o swyddi newydd a chwe chyfleuster prosesu pwrpasol newydd
Mae Exchange For Change, y sefydliad a arweinir gan y diwydiant sy’n cyflwyno’r Cynllun Dychwelyd Ernes (DRS) ledled y DU, wedi cyhoeddi creu seilwaith ailgylchu newydd yn y DU a fydd yn cefnogi cyflawni’r cynllun o fis Hydref 2027.
Yn dilyn proses dendro helaeth, mae pum darparwr rheoli gwastraff ac ailgylchu wedi’u penodi i ddarparu gweithgareddau logisteg a phrosesu ledled y DU. Mae’r dull hwn wedi’i gynllunio i sicrhau’r cadernid mwyaf posibl ar draws y system a bydd hefyd yn caniatáu i’r seilwaith gael ei raddio yn y dyfodol.
Y cwmnïau a benodwyd a’r rhanbarthau y byddant yn eu gwasanaethu yw:
- SUEZ – rhanbarthau Gogledd-ddwyrain, Gogledd-orllewin, Gorllewin-canolbarth a De-orllewin Lloegr
- CIRQLR – rhanbarthau Dwyrain-canolbarth, De a De-ddwyrain Lloegr
- Re.Group – yr Alban, gan weithio mewn partneriaeth â Hargreaves Services plc
- Bywaters – Llundain
- Re-Gen – Gogledd Iwerddon
Bydd y cytundebau’n datgloi miliynau o bunnoedd o fuddsoddiad yn seilwaith ailgylchu’r DU a disgwylir iddynt greu tua 700 o swyddi newydd. Bydd tri chyfleuster prosesu DRS pwrpasol yn yr Alban, Scunthorpe a Guildford, dwy linell brosesu DRS bwrpasol yn Isle of Dogs a Newry, ac un cyfleuster ailgylchu plastigion a rennir yn Avonmouth yn weithredol o fis Hydref 2027.
Bydd ehangu’n dilyn gyda chreu tri chyfleuster prosesu pwrpasol newydd yn Ely yn Swydd Gaergrawnt, Knowsley yng Nglannau Mersi, ac Avonmouth, a fydd yn weithredol o fis Hydref 2030. Disgwylir hefyd y bydd tua 400 o gerbydau ailgylchu newydd yn cael eu rhoi ar waith i hwyluso casglu deunyddiau’r DRS o bob cwr o’r DU.
O fis Hydref 2027, bydd y Cynllun Dychwelyd Ernes yn gweld ernes 20c yn cael ei rhoi ar bob cynhwysydd diod plastig PET, alwminiwm a dur untro rhwng 3L a 150ml. Bydd defnyddwyr wedyn yn cael eu hernes yn ôl pan fyddant yn dychwelyd eu cynwysyddion diodydd i fan dychwelyd.
Dywedodd Russell Davies, Prif Weithredwr Exchange for Change: “Bydd y Cynllun Dychwelyd Ernes yn trawsnewid sut mae’r DU yn ailgylchu. Nid yn unig y mae hyn yn ymwneud ag atal gwastraff rhag llygru ein trefi, cefn gwlad, afonydd a thraethau, ond hefyd â buddsoddi yn yr hirdymor mewn seilwaith amgylcheddol, swyddi a chyfleoedd newydd ledled y DU.
“Mae cadarnhau ein partneriaid logisteg a phrosesu yn garreg filltir sylweddol arall yn ein paratoadau ar gyfer y cynllun yn mynd yn fyw o fis Hydref 2027, ac mae’n gyffrous gweld y buddsoddiad mewn asedau a chyfleusterau yn mynd rhagddo, a fydd hefyd yn creu cannoedd o swyddi ledled y DU.
“Gyda’i gilydd bydd y pum cwmni rheoli gwastraff yn creu rhwydwaith casgliadau cadarn a graddadwy a fydd yn sicrhau bod deunyddiau’r DRS yn cael eu casglu a’u prosesu’n effeithlon. Edrychwn ymlaen at weithio gyda’n partneriaid i gyflawni’r elfen hollbwysig hon o’r cynllun dychwelyd ernes pan fydd yn mynd yn fyw ym mis Hydref 2027.”
Partneriaid logisteg a phrosesu Exchange For Change fydd yn gyfrifol am gasglu’r poteli a’r caniau a ddychwelwyd o fannau dychwelyd a’u prosesu fel y gellir ailgylchu’r deunydd yn gynwysyddion diodydd newydd. Amcangyfrifir bod mwy na 6.5 biliwn o ganiau a photeli yn y DU yn gorffen fel gwastraff bob blwyddyn yn hytrach na chael eu hailgylchu, tra bo’r gyfradd ddychwelyd gyfartalog mewn gwledydd Ewropeaidd sydd â DRS yn 90 y cant.
Dywedodd John Scanlon, Is-lywydd Gweithredol SUEZ yn y DU: “Mae SUEZ wedi hyrwyddo economi fwy effeithlon o ran adnoddau yn y DU ers tro byd ac mae’r cynllun dychwelyd ernes yn fecanwaith cyflawni allweddol ar gyfer hyn, gan gasglu deunyddiau o ansawdd uchel i hybu ailgylchu domestig. Rwy’n falch iawn bod Exchange For Change wedi ymddiried yn SUEZ i gyflwyno’r gwasanaeth arloesol hwn mewn pedwar o’i ddeg rhanbarth ac edrychaf ymlaen at gydweithio i hyrwyddo cylcholdeb, cefnogi diogelwch adnoddau domestig a hybu ffyniant rhanbarthol drwy greu swyddi gwyrdd lleol.”
Dywedodd David Palmer-Jones OBE, Prif Weithredwr CIRQLR: “Mae CIRQLR yn falch iawn o fod wedi cael ei ddewis yn brif gyflenwr i Exchange for Change wrth gyflawni cynllun dychwelyd ernes diodydd newydd y DU (DRS). Bydd y cynllun DRS hwn yn cynnig newid sylweddol unwaith mewn cenhedlaeth yn yr ymgyrch tuag at fwy o gylcholdeb. Ynghyd â siopwyr, manwerthwyr a gweithgynhyrchwyr diodydd, bydd CIRQLR yn gweithio fel y gellir casglu ac ailgylchu poteli plastig a chaniau metel, gan roi ail fywyd iddynt.”
Dywedodd David Singh, Rheolwr Gyfarwyddwr Re.Group: “Mae Re.Group wrth ei fodd yn gweithio gydag Exchange For Change i helpu i gyflawni DRS y DU. Ar ôl darparu gwasanaethau DRS ar raddfa fawr yn Awstralia, rydym wedi gweld yn uniongyrchol yr effaith gadarnhaol y mae’r cynlluniau hyn yn ei chael ar gymunedau a’r amgylchedd; rydym yn gyffrous i fod yn gweithio gyda’n partneriaid logisteg Hargreaves Services plc a chydag Exchange For Change i sicrhau canlyniadau gwych i bobl yr Alban.”
Dywedodd John P. Glover, Rheolwr Gyfarwyddwr Bywaters: “Rydym yn hynod falch a chyffrous o fod yn rhan o Gynllun Dychwelyd Ernes y DU, gan ddarparu gwasanaethau logisteg a phrosesu yn Llundain. Mae’r prosiect hwn yn gweddu’n berffaith i Bywaters, gan ddwyn ynghyd ein lleoliad canolog, ein henw da am ansawdd, ein sylw i fanylion a’n gallu i ddarparu atebion pwrpasol. Wrth i ni edrych ymlaen at ein pen-blwydd yn 75 oed y flwyddyn nesaf, mae’r contract hwn yn gyfle cyffrous wrth greu rhywbeth chwyldroadol ar gyfer y dyfodol.”
Dywedodd Joseph Doherty, Prif Weithredwr Re-Gen: “Rydym yn falch iawn o fod wedi cael ein penodi gan Exchange for Change yn bartner casglu a phrosesu Gogledd Iwerddon ar gyfer y Cynllun Dychwelyd Ernes. Mae hyn yn garreg filltir fawr i Re-Gen ac yn gam pwysig wrth greu’r seilwaith sydd ei angen i gyflawni DRS llwyddiannus ar draws y rhanbarth. Edrychwn ymlaen at weithio’n agos gyda manwerthwyr, Exchange For Change a rhanddeiliaid ar draws y gadwyn gyflenwi i sicrhau bod y Cynllun Dychwelyd Ernes yn dod â buddion amgylcheddol ac economaidd parhaol i Ogledd Iwerddon.”
