Exchange For Change yn Cyflwyno Ffioedd Cynhyrchwyr Graddedig ar gyfer y Cynllun Dychwelyd Ernes
Mae Exchange For Change, y sefydliad a arweinir gan y diwydiant sy’n cyflwyno’r Cynllun Dychwelyd Ernes (DRS) ledled y DU, wedi cyhoeddi’r ffioedd cynhyrchwyr arfaethedig ar gyfer y cynllun, a fydd yn lansio ym mis Hydref 2027.
Ffioedd cynhyrchwyr yw’r taliadau y bydd cynhyrchwyr diodydd yn eu talu i helpu i dalu costau gweithredu’r cynllun. Mae cyhoeddi’r ffioedd cynhyrchwyr yn dilyn ymgynghori ac ymgysylltu helaeth â’r diwydiant dros sawl mis.
Er mwyn lleihau costau i fusnesau ar ddechrau’r cynllun, bydd y ffi cynhyrchydd yn cael ei gosod ar 0p am 15 mis cyntaf gweithrediad y DRS (Hydref 2027-Rhagfyr 2028). Ar sail y data presennol, rhagwelir y bydd ffioedd cynhyrchwyr wedyn yn 0.6p yr uned ar gyfer cynwysyddion alwminiwm a dur ac yn 2.3p yr uned ar gyfer cynwysyddion PET, a ragamcanir i ddod i rym rhwng Ionawr 2029 a Rhagfyr 2032. Bydd hyn yn cael ei adolygu, ei ddilysu a’i ailgadarnhau ym mis Mai 2027.
Bydd Exchange For Change yn parhau i adolygu’r ffi cynhyrchydd wrth i ragor o ragolygon cost, prisio cytundebol a data gweithredol ddod ar gael, a bydd yn ailgadarnhau’r ffioedd yn dilyn proses ddilysu arall ym mis Mai 2027. Bydd ffioedd cynhyrchwyr wedyn yn parhau i gael eu hadolygu’n flynyddol ar ôl i’r cynllun gael ei lansio, a’u haddasu os oes angen.
Denodd ymgynghoriad eang ar y ffioedd ymatebion o bob rhan o’r gadwyn gyflenwi diodydd, yn cynrychioli cynhyrchwyr a manwerthwyr o bob maint, ac roedd y rhain yn llywio’n uniongyrchol ymagwedd Exchange For Change at bennu strwythur a lefelau’r ffi cynhyrchydd.
Mae cyhoeddi’r ffioedd cynhyrchwyr yn garreg filltir fawr arall a gyflawnwyd wrth i ni symud tuag at lansio’r cynllun dychwelyd ernes ym mis Hydref 2027, a bydd yn helpu busnesau gyda’u paratoadau a’u cynllunio. Mae ein hymagwedd at bennu’r ffioedd cynhyrchwyr wedi ei seilio ar ymgysylltu cydweithredol ac adeiladol â’r diwydiant, a hoffwn ddiolch i bawb y bu eu cyfraniadau’n help i lywio ac arwain y canlyniad. Rydym yn cydnabod ehangder y gwaith sy’n cael ei wneud gan y diwydiant i baratoi ar gyfer y lansiad ym mis Hydref 2027. Bwriad gosod ffi cynhyrchydd o 0p am 15 mis cyntaf y cynllun yw cefnogi busnesau yng nghyfnodau cynnar y cynllun. Fel sefydliad dielw, rydym wedi ymrwymo i sicrhau bod ffioedd cynhyrchwyr bob amser yn aros mor isel â phosibl, gan gefnogi cynaliadwyedd ariannol hirdymor y cynllun ar yr un pryd.
Cyhoeddi’r ffioedd cynhyrchwyr yw’r garreg filltir ddiweddaraf yng nghynllun cyflawni Exchange For Change ac mae’n dilyn cadarnhau’r ernes 20p ym mis Ebrill, ochr yn ochr â chadarnhau’r Ffi Trin Dychweliadau, y prosesau eithrio pwyntiau dychwelyd a grantiau i fanwerthwyr bach annibynnol yn ystod y misoedd diwethaf.